البرغشة النجمة

انتو ومارقين عالطريق، فيكم دغري تلاحظو البرغشة النجمة يلي حتي الان عاملة دعايتين

الاولى دعاية شماس للزجاج والثانية دعاية فاب

انو ما لقيتولكم برغة ثانية او كيف

ولّا مدروسة، انو بنركّب زجاج واذا ظمطت البرغشة، هيي ذاتها بنكون حاطينلها فاب وهيك بتستشهد

الرجاء النظر الى الصور ادناه

وكل موسم وانتو بلا برغش

محيّر

يعني للصراحة، فتت عم بعمل اكاونت على غوغل بلاس

واذ بتفاجئ بسؤال عن الجنس؛ يرجى النظر الى الصور

انو اذا ترجمناها عالعربي بتصير: ذكر / انثى / وتالت وحدي شو معقول تصير، محيّر مثلا

شو هالانفتاح الغير مسبوق، تخايل فايت عالبروفايل عن احد الاشخاص والجنس تبعو "محيّر"، شو حلو

شكلو الوضع رايح صوب الـ شي تك تك شي تيعة

عطي خبزك للخباز

لو اكل نصفه

انو شو هالديزاينر القوي للماركة العالمية الـ دانكين دوناتس

مش ظابطة معو بـ ولا فيزوييل

الـ سو بلا عندو ايد ب ٦ اصابع

والـ بوستر مقطوشة ايدي، بعيد ع جميع القرّاء الكرمين

انو ولو، ما حدا انتبهلهم

للمساعدة في المرّة القادمة؛ شي تك تك شي تيعة تقدّم كل خدماتها، لالّا نضطرّ نكتب عنكم مرّة ثانية

وشكرا

تمثال الحرية

الرابع من تموز، ينعاد ع كل الشعب الاميركي بالعالم اجمع و ع كريستف كولومبس يلي عرفنا عليكم.
انشالله بتضل ايامكم فرح واستقلال. بس انو شو رايكم تخلو شعوب العالم تعيش هيي كمان هيك ايام.

وبالمناسبة، اعلن شهود عيان، انو تمثال الحرية زرف دمع في تمام الساعة 8 صباحا، متاثرا باليوم العظيم

Cheers

اه يا اباضاي

مشروب الطاقة ابو العبد، انّو يعني بلا رد بول بقا
بكرا بصير في ابو العبد اكستريم سبورتس، وسيارات فورمولا ابو العبد

تعو لنشوف مشروب الطاقة ابو العبد شو معقول يعمل فيكم:
- بتصير تنكّت نكت يا محلا ابو العبد ونكتو البايخة
- بتصير تكب الطربوش من ورا ظهرك وتجي لابسه
- المسبحة بتبرمها اي بتسبحها بثلاث ثواني
- راس الارغيلة بتشحترو وبتحرق سلّافو بـ عشر دقائق
- بتقلب لهجتك بيروتي ولو كنت من جرود بعلبك
وشو بدّي قلكم بعد، جربوه وانتو خبروني

بس كإسم لمشروب طاقة، شخصيا لقيتو شي تك تك شي تيعة

 

 

قطّاع الطرق

نايس اد

فعلا ان الدعاية من صنع امباكت ب ب د و وهدفها التوضيح ان جسر المشاة معمول لتقطعو عليه مش تحته

قطعة الطريق منّا تجغيل ولا حربقة، اذا انت غشيم وعبال تقطع الطريق، ما زنبو يبتلي فيك يلّي رح يقشّك

برافو اللدعاية ولازم كلكم تشوفوها

http://youtu.be/hOmbvsK-qF4

طبيعي او سيزاريان

الكل عم يترقّب، القلوب عم تخفق، جميع الصحافيين والمصورين عم يغزلو بقصر بعبدا.
الشعب كلو ناطر، الكل حاملين المحارم الورقية لمسح الدموع التي ستذرف لحظة اعلان الحكومة الجديدة.

مين قولكم الوزراء، قولكم حضّروا بذلاتهم البيض للصورة؟
البذلة البيضة منها مهمة، المهم تكون كفوفهم بيضا (وتضلّ) ويشتغلو بضمير.

بنتمنّى تكون الولادة سليمة لأنّو الحَبَلْ كان صعب وبتصوّر الشعب كلو حِبِلْ