لما يتغير عليكم شي

صباح العجقة

لكل انسان نازل عـ شغلو ومتفائل انو اليوم الطريق فاضية

واسفاه كانت المفاجأة، عجقة اكتر من النهار العادي

ليش

لانو الشاحنة التي كانت  تنقل الوقود راقضة عـجنبها والوقود عالطريق

انو الشوفور كان مستعجل وقال انو هيك هيك الطريق فاضية ليش ما بعمل نقلتين بدلا من واحد

وها هو يزرب مئات المواطنين المعترين يلي نازلين عشغلهم بنهار عطلة

الهدف: لما يتغير عليكم شي، ولما تقولو شو حلوة الطريق بلا عجقة. يلي بغير عادته بتقل سعادته، وعلى قد ما بنحبكم سعداء عجقنا السير

ولكل شوفور كميون، هيدا كميون وليهههه! منو متشبوكس 

السواقة اخلاق

دعاية ل "ن س س" بتجسّد حالة كل طريق واتوستراد وزاروبة عنّا

 

ايها الشعب الكريم، الطريق شي، والاوتو تومبونوز شي تاني، حلكم تفوقو بقا

 

رافقتكم السلامة

 

 

ليش مدندلها هيك

صحيح قلنا مدندلها بس هيّي للمظبوط ع كذا شكل ...

في منهم، بدندلوها من الشباك مسح مع الباب، هيدا بكون زهقان وعندو مشوار.
في قسم تاني، بيبقى ماددها من الشباك وعم ياعب بالهوا ع شكل "فرارو جاكو"
والقسم التالت والالذّ... هو يلي بيبقى عاملك مسرح صامت بإيدو، بسليك اذا انت سايق وراه... بتفهم كل القصة من حركات ايدو... معصب، مغروم (ومنها معو)، خبرية مفيدة، بس لت حكي، الخ...

والحلو انو هول كلهم بيستعملوها اشارة اذا قرر يفتلو بشي مفرق.
نصيحة، خليها جوّا لسلامتك الشخصية، السيارة "تو رسك" بس إنت لأ، للسلامة العامة استعمل بدالها الاشارة البتضوّي، وايديك الاثنين مفروض يكونو ع شكل 10:10 على المقود لتكون سواقتك سليمة ومش شي تك تك شي تيعة

Limit ظبوطة

بما انو العالم كلها مشغولة بظبوطة السرعة، وصارو بسوقو، وزيادة عن السيلولير بايد و العروس بالتاني... بطّلت عيونن عالطريق، صارت على الكيلوميتراج...

تنخفف الهلع... عندي فكرة، مثلا، يحدد الواحد 300،000 ل.ل بالشهر ظبوطة... كيف يعني؟ يعني بتطلع عوزارة الداخلية وبتقدم طلب, وبتقلن انو انت فيك تدفع ماكسيموم 300،000 ل.ل.، وبس تصير قيمة ظبوطتك 300،000 ل.ل بيبعتولك رسالة عل الخليوي “نرجو منك التوقف عن القيادة هذا الشهر ومعاودة القيادة عند قبض معاشك الشهر المقبل...وشكرا”.

يعني احسن ما يطلعو "اوفر بدجيت

وتصير حالتك شي تك تك، شي تيعة