الطقس كيف

يعني صرلنا زمان ما كتبنالكم شي، انو ما في شي جديد لنلتّ عنو
بهيك حالة الطقس اظبط شي، انو بس ما تعرف شو بدك تحكي بتحكي عن الطقس

قولكم كيف رح يكون بهالويك اند، مشمس، مشمس الى غائم، قليل الغيوم...
كيف يعني مشمس الى غائم، يعني يا ريتكم ما نطقتوا، شو مشمس الى غائم

ومتل ما قالت ليلى عبد اللطيف رع تضل تشتي لاخر حزيران، رح تظبط معها يا ترا؟
انشالله لا، انو دافعين اجار الشاليه 11٫000$، بلا مؤاخذة شو 11،000$ شو عم تستاجر بهواي

ما رح مطّ والعي بقا، بكملكم المقال بس ما يكون عندي شي احكي
وشكراً

البقيّة بحياتكم

ان اسرة شي تك تك شي تيعة تتقدّم بالتعزية من عائلة واحبّاء الشهيد المناضل اسامة الذي قضى غدراً على يد الاميركان
و بنفس الوقت وتحت المقال ذاته تهنّأ العالم واميركا بالاخصّ على الانجاز العظيم.

القارئ: ولك، ما فيك تكتب انّك مع وضدّ بنفس المقال
الكاتب: مبلا يا اخي العزيز، بالنهاية نحنا ما فينا ناخد طرف بدّنا نرضي الكلّ، وبالاصل الموضوع اكبر من انو ناخد طرف في

الكاتب: بس يلي لفت انتباهي، هو تحذير الجالية الاجنبية من ردّة الفعل بالعالم اجمع
انو شو بيعملو الجماعة، بيزربوا حالهم، او بيتنقلوا لابسين دروع وطاسات، او مثلا بيتكلوا ع الله وبيمشوا.. طيّب بركي يلّي رح يستهدفهم هو كمان متكل ع الله

ينعاد على الجميع، جميع العاملين والعاطلين عن العمل

بعيّد كل شخص مفرّص وعم يقرا هيدا المقال عالـ لاب توب او ب ب او اي فون
بعيّد كل شخص عم يشتغل ليأمّن رفاهية الشخص المفرّص اي مثل موظفين المطاعم
بعيّد كل الاشخاص والنسوان بالاخصّ يلّي شغلهم قهوة ولألأة من قبل الضوّ لآخر الليل
واخيرا وليس اخرا بعيّد موظفين الدولة، يلّي اصلا هنّ وبالشغل مفرّصين (صبحية، تلفونات للاهل، فرصة الغداء وتضبضب الغراض تحضيراً للفلّة)

وكل عيد وانتو بالف خير

تطورات بحفل العرس الملكي

الكل في العالم ينتظر هذا النهار الحافل، انه يوم الزفاف الملكي.
هل سوف تمطر؟ كيف سيأتي المعازيم...

بعض الانباء السريّة، وهي باستبدال حصل بتنظيم الاحتفال، وصلت الى وكالة الانباء “شي تك تك شي تيعة” ونحن بدورنا سوف نتشاركها وإيّاكم كما هي:

- سوف يتمّ استبدال فرقة The Band of the Coldstream Guards بـ “نوبة المتين” لقوّة وجودة عزفهم
- الاستغناء عن The 1902 State Landau carriage، لعدم كسف المعلم نجيب الذي عرض خدمة بغله “رعد” لنقل العروسين
- واعلنت لجنة منسقي "شباب الكوع" انها ستطلق واحد وعشرين صاروخ اينرغا من العاصمة بيروت باتجاه المملكة المتحدة ابتهاجاً
- كما وانّ العروسين قررا ان الكوكتيل لم يعد في The garden at Clarence House بعد الان وانما سوف ينتقل المعازيم الى “جنينة التيتة جنفياف” في منطقة القرنة السودة للاحتفال. وبالمناسبة سوف يتم ذبح معزاية وخاروف احتفالا، والمعلاق سيقدّم للجميع.

و منّا للعروسين “انشالله بنأشعلكم قريباً” و”عقبال العايزين" للجميع

و ليليليليليليششششششش

تألوا بيضاتكم

كما وهي العادة، من حيث لا ندري، وفجأة، بيطلعلنا اعلانات ولا اروع على طرقاتنا

اليوم الوقفة مع دعاية هوا تشيكن
الجماعة بيضاتهم عم بطيروا، فيا عالم، اذا حبيتوا تشتروا بيض من هوا تشيكن بهالعيد، تقلوهم
وخاصة من بعد ما تتعذبوا وتلونوهم، تقلوهم، لعلّ طاروا
بعد عناء السلق والتزيين، يقوموا يطيروا
على قد منهم خفاف ونضاف، الوضع خطر. تقلوهم، ربطوهم بشي، ما تفتحوا الشبابيك اكتر من 2 سم، جيبوا حدا يراقبهم
يعني حبينا نلفت نظركم ونبهكم

وبلا اعلانات شي تك تك شي تيعة بقا

حريق في بلدة كفر خوخ

كما اعلمتنا الوكالة الوطنية لتقسي الحقائق او الاكاذيب، انه شبّ حريق هائل في مستودع في خراج بلدة كفر خوخ البقاعيّة.

BMW M-Zero و اربعة سيارات من نوع Audi A3 Sportsback مما ادّى الى احتراق سيارتين

وعند منتصف الليل، امتدّى الحريق الى البناية المجاورة مما ادي الى انفجار مستودع ذخيرة.

نحمد الله على ان الاضرار اقتصرت على الماديات ولا اضرار في النفوس.

يعني بالرزق ولا بصحابو... شغل ليلتين وبينجاب بدالن

نمرة حمرة

نحنا الشوفوريّة نحنا شرايين المدينة... لـ مرسيل خليفة

يا خيي مرسيل، من زمان كانو شرايين المدينة، بس هلّأ ما بقي ولا شريان غير ما سادينو

هيدا المقال لكل شوفور تاكسي بركي بحس ع دمو:
☜ يا خيّي، انت كل النهار عالطريق، بس غيرك بدو شي ويوصل؛ فيا زيح، يا همّا
☜ مش ضرورة كل واحد واقف ع طرف الطريق تشوفو 2000ل.ل. وتصير بدك تطلعو بالقوة
☜ رزقتك هنّي الناس يلي ع يمينك، يلي عالميلي التاني مش الك، ولا رح يسمعوك ما تبح لا صوتك ولا الزمّور، ولا رح يقطعو الطريق لسواد عيونك
☜ اذا انطفى الضو بالطابق الخامس، مش يعني الزلمي فالل من بيتو، وتحس حالك مجبور تنطره تيوصل، بالسيارة معك غير ركاب حابين يوصلو
☜ ما بحياتك تنزّل راكب ع ميلة الشمال، اذا هوّي زمط، بابك مش رح يزمط
☜ ثلاثة ورا عال، بس هول التنين قدام شو؟ شو زنبو يلي طلع بالاول قدام، والكارسة اذا حضرتك قررت تركّب سانكيام
☜ مش كل ما انت واقف وصافف سيارتكك تقول لكل واحد مارق “تكس تكس، تكس تكس...”

انا رح وقّف هون، بتمنّى انتو اعزّائي تكملو لانو التعداد ما بيخلص
ويا ايها السائق، جرّب بدل الخمسة يركب عشرة بركي بوفّي معنا الشغل، والف عافي