About Us / مختصر عنّا

My photo
Welcome to the Shi Tiktik Shi Ti3a World! The blog’s name basically tells you everything you need to know about it: We feed you with the funny amusing yet sad and pathetic events and facts occurring in the world, and ESPECIALLY in Lebanon. You too can take part in this by adding your comments or posting your pictures and ideas! So buckle up your seatbelt for the FECH KHEL2AK journey!

Wednesday, June 15, 2011

قطّاع الطرق

نايس اد

فعلا ان الدعاية من صنع امباكت ب ب د و وهدفها التوضيح ان جسر المشاة معمول لتقطعو عليه مش تحته

قطعة الطريق منّا تجغيل ولا حربقة، اذا انت غشيم وعبال تقطع الطريق، ما زنبو يبتلي فيك يلّي رح يقشّك

برافو اللدعاية ولازم كلكم تشوفوها

http://youtu.be/hOmbvsK-qF4


Monday, June 13, 2011

طبيعي او سيزاريان

الكل عم يترقّب، القلوب عم تخفق، جميع الصحافيين والمصورين عم يغزلو بقصر بعبدا.
الشعب كلو ناطر، الكل حاملين المحارم الورقية لمسح الدموع التي ستذرف لحظة اعلان الحكومة الجديدة.

مين قولكم الوزراء، قولكم حضّروا بذلاتهم البيض للصورة؟
البذلة البيضة منها مهمة، المهم تكون كفوفهم بيضا (وتضلّ) ويشتغلو بضمير.

بنتمنّى تكون الولادة سليمة لأنّو الحَبَلْ كان صعب وبتصوّر الشعب كلو حِبِلْ


Wednesday, June 8, 2011

انشالله كلكم بتنجحوا

اليوم وكما هي العادة في كل سنة، بدأت الامتحانات الرسمية واليوم بلشنا بالبروفيه

بعض النصائح التي ستساعد التلاميذ في امتحاناتهم:
- مش ضروري تنسخو الدروس بخط اليد، عملو فوتوكوبي على -30٪، وهيك فيكم تعملو الكتاب كلو
- اي قنينة مياه، مكتوب عليها درس الكيمياء: كالسيوم، ماغنيزيوم... ويلا ستفيدو
- اي علبة علكة كبيرة، مثلا سمينت، يمكن اعادة صنع الغلاف حيث سيتسع لاكبر عدد من الفورمولات
- لبسو شورت، وعليه من الداخل فيكم تكتبو شو ما بدكم
- اذا انتبهتو انو الاستاذ/ة بدخنو، جيبو معكم غروس من الصنف ذاته في اليوم التالي مرفقا بالكتاب كلو يلي عندم فيه فحص

ونتمنى من كل من له خبرة بالموضوع اعلاه، اضافة ما امكنه من معلومات وطرق، تساعد التلميذ المعتّر يلي ما صرلو وقت يتدرس

بالتوفيق، ونتمنى يكون التصحيح في ما بعد، مش شي تك تك شي تيعة



Monday, June 6, 2011

مبروك... بس فتحوا الطريق

رجعت الصيفية، ورجعوا الاعراس والزفة، والفرقاع والخ
يعني انا مش عم قلكم ما تتجوزوا وتنبسطوا
الله يهنيكم ونقشعلكم عرّ ولاد

بس الطلب الوحيد، غيرولي عادة التصوير عالطريق والكونفوايات، الطريق مش لا لامَك ولا لامِك. ويلي رايح شي مشوار، منوا مجبور يمشي وراكم ويعلق بعجقتكم

وانتي يا عروس، مينك انتي لتوقفي عالسيارة وتوزعي سلامات للعالم شمال ويمين وهني مش تاركينلك مسبي بسبب عجقتك

بتمنّى تكونو استوعبتو، والويك اند الجايي اعلق باقلّ عجقة وبلا اعراس شي تك تك شي تيعة


Wednesday, May 25, 2011

الطقس كيف

يعني صرلنا زمان ما كتبنالكم شي، انو ما في شي جديد لنلتّ عنو
بهيك حالة الطقس اظبط شي، انو بس ما تعرف شو بدك تحكي بتحكي عن الطقس

قولكم كيف رح يكون بهالويك اند، مشمس، مشمس الى غائم، قليل الغيوم...
كيف يعني مشمس الى غائم، يعني يا ريتكم ما نطقتوا، شو مشمس الى غائم

ومتل ما قالت ليلى عبد اللطيف رع تضل تشتي لاخر حزيران، رح تظبط معها يا ترا؟
انشالله لا، انو دافعين اجار الشاليه 11٫000$، بلا مؤاخذة شو 11،000$ شو عم تستاجر بهواي

ما رح مطّ والعي بقا، بكملكم المقال بس ما يكون عندي شي احكي
وشكراً


Monday, May 2, 2011

البقيّة بحياتكم

ان اسرة شي تك تك شي تيعة تتقدّم بالتعزية من عائلة واحبّاء الشهيد المناضل اسامة الذي قضى غدراً على يد الاميركان
و بنفس الوقت وتحت المقال ذاته تهنّأ العالم واميركا بالاخصّ على الانجاز العظيم.

القارئ: ولك، ما فيك تكتب انّك مع وضدّ بنفس المقال
الكاتب: مبلا يا اخي العزيز، بالنهاية نحنا ما فينا ناخد طرف بدّنا نرضي الكلّ، وبالاصل الموضوع اكبر من انو ناخد طرف في

الكاتب: بس يلي لفت انتباهي، هو تحذير الجالية الاجنبية من ردّة الفعل بالعالم اجمع
انو شو بيعملو الجماعة، بيزربوا حالهم، او بيتنقلوا لابسين دروع وطاسات، او مثلا بيتكلوا ع الله وبيمشوا.. طيّب بركي يلّي رح يستهدفهم هو كمان متكل ع الله


ينعاد على الجميع، جميع العاملين والعاطلين عن العمل

بعيّد كل شخص مفرّص وعم يقرا هيدا المقال عالـ لاب توب او ب ب او اي فون
بعيّد كل شخص عم يشتغل ليأمّن رفاهية الشخص المفرّص اي مثل موظفين المطاعم
بعيّد كل الاشخاص والنسوان بالاخصّ يلّي شغلهم قهوة ولألأة من قبل الضوّ لآخر الليل
واخيرا وليس اخرا بعيّد موظفين الدولة، يلّي اصلا هنّ وبالشغل مفرّصين (صبحية، تلفونات للاهل، فرصة الغداء وتضبضب الغراض تحضيراً للفلّة)

وكل عيد وانتو بالف خير