شو ما كانت سيارتك، الزينة موجودة

وبما انو فترة العيد قربت، وبلشنا نسمع بـ بابا نويل، فحابين نبشركم ونوركم عن زينة لسياراتكم.
كل السيارات يا اخوان فيها حد المقود مسكة... ولك لأ مش المساحات تاني وحدي... واذا جعلتها لفوق بتدور زينة اليمين «ورا وقدام بدورو سوا واوقات ضو المراية كمان» ولتحت اذا بدك تدور زينة الشمال.
استعملهم زينة بفترة العيد، بركي الله بيترحم عـ هالشعب وبتتعود عليهم بقية السنة.
هلأ صحيح ما عليهم ظبوطة، بس بلاهم سواقتك شي تك تك شي تيعة

عيد مبارك

ان كتّاب ومنسقي بلوغ شي تك تك شي تيعة تتمنى للعالم ككل، ولللبنانيين خصوصا وللمسلمين بالاخصّ عيد اضحى مبارك

وانشالله بينعاد عليكم السنة الجايي باوضاع واجواء ونفسيات احسن بشوي من شي تك تك شي تيعة

وكل عام وانتم بخير

خلقك الله وخلقنا منك قالب

المدام: بليز حكيم في يصير منخاري شوي اصغر، شوي لفوق

الحكيم: مدام شوفي هيدول المجلات ونقي المنخار يلي بدّك

تاني مدام: فيي اشقل صدري شوي وكبرو شوي بس، يعني متل باميلا

الحكيم: عنّا هيدولي القياسات - وبيفتح الخزانة وبفرجيا جميع المساطر

تالت ورابع وخامس ... مدامات: الشفاف، الوجه، الدينان، اصابع الاجران

وبالنهاية الحكيم الذكي، يوصّي من جمهورية الصين الشعبية على قوالب لمنخار نانسي، خدود هيفا، صدر باميلا

ولتفادي الغلط نتمنى تصحيح المتل: بنخلق من الشبه اربع ملايين

مع تحيات شي تك تك شي تيعة

Limit ظبوطة

بما انو العالم كلها مشغولة بظبوطة السرعة، وصارو بسوقو، وزيادة عن السيلولير بايد و العروس بالتاني... بطّلت عيونن عالطريق، صارت على الكيلوميتراج...

تنخفف الهلع... عندي فكرة، مثلا، يحدد الواحد 300،000 ل.ل بالشهر ظبوطة... كيف يعني؟ يعني بتطلع عوزارة الداخلية وبتقدم طلب, وبتقلن انو انت فيك تدفع ماكسيموم 300،000 ل.ل.، وبس تصير قيمة ظبوطتك 300،000 ل.ل بيبعتولك رسالة عل الخليوي “نرجو منك التوقف عن القيادة هذا الشهر ومعاودة القيادة عند قبض معاشك الشهر المقبل...وشكرا”.

يعني احسن ما يطلعو "اوفر بدجيت

وتصير حالتك شي تك تك، شي تيعة

الحلو بالبلغصة

وليههه... وليه شو هالافكار الجهنمية لتبيعو الشوكولا !!!
أنو ما في يكون شوكولا طيب إلا اذا الواحد جوي حالو وجوي تيابو والدني...
ولك بنربّي الولاد سنين تيعرفو ياكلو متل العالم... جايين حضراتكم تنزعوهم هلّأ !!!
ياكْلو شوكولا مش عم قول لأ ... بس بلا فجعنة و بلغصة...
الولاد المهزّبين والمرتبين من شو بيشكو، اولكن ما بيستطعمو !!!
يعني للصراحة، لقينا فكرتكم شي تك تك، شي تيعة 

كيف بيمشي السير

الكل عم بعاني من العجقة...
انا بشكر مين يلي عم بمشي السير... بس انو يا مشي، يا شي تاني...
شو اصدي بشي تاني، يعني شرب القهوة عالاشارة، الدخان، التبصبص عفخاد الصبايا، ارسال رسالة من السيلولار...
ويعني اذا قرر ينتبه للسيارات بكون متل يلّي واقف عالمنقل “هوّيلو”، وين الكفوف البيض؟ ايدك عليها شوي لو عزبناك تنشوفها...

يعطيكن الف عافية، لو ما منكن كانت حالتنا شي تك تك، شي تيعة

زين xtrem adventure

دورت الـ ت ف، واذ طلعلي دعاية مش من اولها بس بتفرجيك واحد بالـ باراشوت، فجقة عالحصان، بعدان فجقة بالميّ...
لثوانٍ، قلت تنشوف هيدي وين، بركي بنروح قبل ما تبلّش الشتوية...
المفاجأة كانت، انو ببيّن زين الاتات باخر الدعاية، جايب معو الشتلة وبكامل تيابو الرياضية...
يعني يعطيك الف عافية.. بنشكرك ع شجاعتك...

بتمنّى دعاية الجايي ما تكون شي تك تك شي تيعة