يا عيب الشوم

بالاول شفت الدعاية عالطريق، قلت يا عيب الشوم شو هالدعاية والـ سلوغان الكريياتيف (الابداع يعني) بس الصدمة الاكبر كانت لما سمعت الدعاية عالراديو اليوم

عاملة باستا بلا ماشروم، يا عيب الشوم

ولك كيف الكم عين تنزلو بهيك دعاية، حرام المواطن البريئ يشوف هيك دعاية

وليه مينك انت

ان اسرة شي تك تك شي تيعة المألفة من كل من معدّي و كاتبي وقارئي و مش قارئي بلوغ شي تك تك شي تيعة، تستنكر وبشدّة جريمة الاعدام و تنعي الشهيد تروي دايفيس

وليه انت مين، منزل من عند الله

بغضّ  النظر اذا الانسان مجرم او لأ، مش من حق انسان تاني ينهيلو حياتو. عاقبو ايه، بس ما تقتلو

انتو يلي عم بتحاربو شعوب العالم باسم حقوق الانسان، وين راحت حقوق تروي دايفيس

ضاع القذافي

بعدما رأت وكالة الانباء شي تك تك شي تيعة ان الثوار اليبيون قد اضاعو القذافي، و ها هم يعرضون مليون دولار لمن يسلّمه، اخذ الخوف يدّب فينا

ليش؟

لانو ال س ن ن عرضت صورة لطرابلس اللبنانية قائلة انه معقل القذافي

طيّب مثلا اذا اميركا صدّقت وكالة الانباء الـ س ن ن وبلشو قصف فينا، شو زنبها اللحم بعجين الطرابلسية حدا يفسرلي

وهنيئا للـ س ن ن بجهلها وبامكاننا ان نعطيها "فرانشايز" شي تك تك شي تيعة

استملحناه بس هرب

يعني ساعة بقولو مات، ساعة لقطناه، ساعة ما لقطناها

وهلا تحت الاقامة الجبرية و فجأة طلع يحكي عالتلفزيون

يعني للصراحة ضعنا

بيان بمناسبة التظاهرات في لندن

اعلنت حركة شباب الكوع عن دعمعها للشعب الانكليزي ولفكتوريا بكهام بالاخص.

وجاء في البيان:
ومن هنا من ارض النضال، ارض التظاهرات ع شو ما كان، نعلن دعمنا للشعوب الانكليزية.
ولكن يا ايها الشعب الغاضب، مش هيك بيتظاهرو، عيب. نحن شعوب العالم التالت مش انتو.
سكّرو طرقات، كسرو، ولّعو دواليب بس ليش النهب، ليش سرقة رزق الغير.
ولو نحنا استحينا نعمل هيك.

واخيرا، نعلن انه ورغم الوضع الكائن عندكم، كل شبابنا من حاملي الشهادات الجامعية، مستعدين لمساندتكم على الارض بحرق الدواليب. بس بدنا نعذبكم بهالـ الغرين كارد ما تصغرو.

وعشتم وعشنا ويعيش

موقف خاص

عادي

الشباب حاجزين الشارع الهم

انو ممنوع تصف عالطريق لانه موقف خاص

حدا حابب يعلّق

الموقف شي تك تك شي تيعة

البرغشة النجمة

انتو ومارقين عالطريق، فيكم دغري تلاحظو البرغشة النجمة يلي حتي الان عاملة دعايتين

الاولى دعاية شماس للزجاج والثانية دعاية فاب

انو ما لقيتولكم برغة ثانية او كيف

ولّا مدروسة، انو بنركّب زجاج واذا ظمطت البرغشة، هيي ذاتها بنكون حاطينلها فاب وهيك بتستشهد

الرجاء النظر الى الصور ادناه

وكل موسم وانتو بلا برغش