ما تنغشّ

كلنا شفنا دعايات حماية المستهلك من المنتوجات المقلّدة

وبكل عين وقحة حاطين اتصل بنا، كان لازم يزيدو بعدها عالاعلان: بعد التأكّد انو مش مدعوم، او مش محسوب ع حدا

ان عدسة شي تك تك شي تيعة قد التقطت هذه الصورة، لاحد انتهاكات “التقليد” بحد ذاته. واننا نضع هذا الاعلان “المروتش” بتصرف الجهات المعنية، واعتبرونا تلفنّا عالـ 1739

انو الشاب، سيدياتو اوريجينال، بس عم ينباعو بعلبة “برينكو” مش هيك! برينكو هيي ارخص نوع “سي دي” للنسخ

شو رايكم تروحو تلقطوا كل يلي عم بيبيعو عالطريق قبل ما تحطو اعلانكم، يعني حسستوني كانكم مش عارفين فيهم، عنتفه كنت رح انزل انا اعتقله ودقلكم. ولك بلا مهزله وحكي شي تك تك شي تيعة، ركزوا عالفعل اكتر بشويّ

ويعطيكم الف عافية

Can you please all set this picture as a profile pic to help stop these rural selling methods
Thank you.

يخليكي فوق راسنا يا ربّ

أمي يا ملاكي، يا...
بعيدك يا ماما...
ستّ الحبايب يا حبيبا...

بمختصر مفيد بدي عيّد كل الامهات بالدني، ونوّه بالتضحيات التي قامت بها لتربيتنا.

بدّي عيّد امي بالاخصّ...، بهيدا المقطع ما بعرف شو بدي اكتب، شو ما قلت رح يطلع قليل.

وبدي عيّد كل ام احترق دينها كرمال ولادها، وطلعوا الولاد ما بجيبولها غير الشتيمة.

وبدّي عيّد كل خادمة منزل من الجاليات الاجنبية، يلّي اخدي دور الام بلا ما تعرف. لانو الـ «المدام» مش فاضية من كتر الصبحيات واللتلتة والـ...

وبالنهاية بعيّد كل ام لرجل سياسي وقلّها: ما كانت ضرورية هيك خليفة

بلا ضمير

يهم وكالة الانباء الـ"شي تك تك شي تيعيّة" التوضيح

ان درجة حرارة ما بين صفر و عشرة لا تؤدّي الى توقّف خلايا الدماغ ولا النخاع الشوكي عن العمل بشكل طبيعي

ونلفت الانتباه الى ان بعض المواطنين والمسؤولين وجدوا حجّة برداءة الطقس، لتبرأة أنفسهم تجاه باقي المواطنين بالقول :"كتير في صقعة، جلّد ضميري". وكما قلنا سابقا، الضمير لا يتأثّر بدرجات الحرارة

فيا اخي العزيز، هكذا أُناس هم بالاصل بلا ضمير، وما دخّل النشرة الجوية بالموضوع، وهم بارتفاع مستمرّ من ناحية العدد. فخلّيك واعي وما تصدّق شو ما كان

لذا وجب التوضيح

حال الطرقات

الطرق الداخلية مقطوعة بسبب كثرة الجوَر
الطرق الجبلية مقطوعة بسبب الثلوج
الطرق البحرية مقطوعة بسبب الامواج
الطرق المساقبة بنزلة، مقطوعة بسبب فتح الريغارات وتفجّر المياه
باقي الطرق مقطوعة بسبب حمير السواقة (ال ب ب مع القيادة، النسكافيه والترويقة مع القيادة، الميك أب مع القيادة بالاضافة الى السيلولير، الراديو، الجريدة...)

انو هيك هيك عجقة ليش ما بنستفيد من الوقت، وتما يروح شي تك تك شي تيعة

وليهههه! ركّزو عالطريق

أمنية كل مذوق بعجقة السير

كما هي العادة في كل يوم من ايام الاسبوع السبع، عجقة السير

وبما انو السواقة اخلاق، امنية كل مذوق هو وعلقان بالعجقة: الله يبعتلنا شي "امبيلانس"-أي سيارة اسعاف، تخرق العجقة تيدحش حالو وراها ويزورب

نرجو ونطلب من هكذا اشخاص مزوقين, انقبرو بس تسمعو صوت سيارة اسعاف كبّو حالكم برات الطريق لتسهّل مرور شخص على شفير الموت وبثانية معقول يفارق الحياة.

وبس تمرق السيارة ما تلحقها، لانو ما بتعرف بأيّ لحظة معقول توقف وتجي انت القبضاي بايسها وتعرقل مسارها وتعرض حالك وحال اربع مسعفين للخطر، بالاضافة الى امكانية قتل مريض بحاجة ماسّة الى مستشفى

هيدا كلّو لأنو حضرتك مش قادر تنطر خمس دقائق زيادة بالعجقة.

نرجو من كل من سوف يقرأ هذا المقال ان يطبّقه وينشره، لأنّه يوما ما ستكون انت او احد افراد عائلتك داخل سيارة الاسعاف والحالة حرجة، والحياة على المحك، ورح يكون في مزوق داحش حالو ورا الامبيلانس، تماما متل ما انت كنت تعمل، وبلحظة ممكن يكون سبب وفات شخص، هيدا كلّو لانو مستعجل وعقلاته شي تك تك شي تيعة

الوطن مش شركة

توفيق ومنير، اثنين زملاء بيشتغلو سوا بشركة.
من يومين، وصل توفيق عالشغل وبلش يقنع منير...

توفيق: لازم نحضّر لثورة وانقلاب بالشركة
منير: ليش الانقلاب، عم نشتغل وكل شي منيح والمعاش والدوام تمام

توفيق: مش شايف كل الشعوب قامة قيامتها ونحن بعدنا قاعدين
منير: اولا يا ذكي، الوطن شي والشركة شي تاني، وثانيا فينا ندعمهم بلا ما نعمل ثورة

توفيق: كيف، الوطن مش متل الشركة
منير: الشركة بتكون لشخص معيّن او لعدد من الاشخاص، بيتوظف فيها ناس، بيشتغلو وبيقبضو معاش والربح لاصحاب الشركة.
اما الوطن فهو كرامة وحرية وبيت وعائلة ومجموعة حقوق. بالوطن اذا بطّل في كرامة وحرية بتعمل ثورة وانقلاب، بس بالشركة ما فيك تعمل ثورة، اكتر شي بتفلّ.

توفيق: اهههههههه، هلّأ فهمت ليش في ناس ما بيستوعبو الثورة الشعبية، لأنو مفكرين الوطن شركة خاصة، هم ملّاكة، والناس موظفين عندهم واذا مش عاجبهم فيهم يفلّو...
منير: برافو توفيق، رجاع ع شغلك وبلا قرارات شي تك تك شي تيعة