About Us / مختصر عنّا

My photo
Welcome to the Shi Tiktik Shi Ti3a World! The blog’s name basically tells you everything you need to know about it: We feed you with the funny amusing yet sad and pathetic events and facts occurring in the world, and ESPECIALLY in Lebanon. You too can take part in this by adding your comments or posting your pictures and ideas! So buckle up your seatbelt for the FECH KHEL2AK journey!

Wednesday, December 29, 2010

حتى غلا البنزين الو ايجابيات



كما علمنا كلّنا ان سعر صفيحة البنزين قد ارتفع ب 400 ليرة لبنانية، زيادة عن سعره، الذي هو بلا الزيادة اصلا ثروة. وسعر الديزل والمازوت قد ارتفع ب 500 ليرة لبنانية.

فان شي تك تك شي تيعة، قد علمت وتحب ان تطمئن جميع المواطنين، ان هذا السعر هو ثابت وباقي طوال هذه السنة، اي 2010.

ونرجو من الجميع تخفيف النكت على محطة البنزين: “فوّلي بـ خمس تلاف”، وبس يخلّص تعباية بتقلو “دعسلك نتفة عالنبريج”.

والنظر الى اجابيات الغلا : بدل ما تروح وحدك الصبح عالشغل، عبّي السيارة من الجيران يلي شغلهم ع طريقك ووصلهم معك وعملوها مداورة، يعني كل يوم بسيارة حدا، مما يشجع التواصل والالفة بين اهل الحيّ الواحد.

واذا عملتو بما قد ورد اعلاه، هيدا بخفف من عجقة السير “عصفورين بحجر واحد”.

وبدال ما تدفّو كل واحد ببيتو، اجتمعو بالملجأ، متل ايام الحرب، وولعو دفّاية واحدة. في اجمل منها ايام الطاولة والطرنيب والكاتورزك وهيدا كمان بشجع الالفة بين الجيران.

كلو هيدا مدروس، يا ايها الشعب اللبناني العظيم، كل شي عم ينعمل لمصلحتكم. غلا مشتقات البترول هو للابتعاد عن خطر حصول الفتنة. هيك ما حدا معو يدفع لوقد الفتنة، عرفتو كيف! يعني هيك بنخفف خطر وقد الفتنة من قبل الشعب الجوعان وبضل في بس خطر وقد الفتنة من قبل شي طرف امكانياتو عالية او من قبل شي دولة خارجية.

واننا ندعو الجميع رؤية النصف المليان من الكبّاية مش النص يلي هوي شي تك تك شي تيعة

Saturday, December 25, 2010

ميري كريستماس


ان كتّاب ومنسقي بلوغ شي تك تك شي تيعة تتمنى للعالم ككل، ولللبنانيين خصوصا وللمسيحيين بالاخصّ عيد ميلاد مجيد
وانشالله بينعاد عليكم السنة الجايي باوضاع واجواء ونفسيات احسن بشوي من شي تك تك شي تيعة
ونعتذر عن انو ما خبرناكم من قبل انو بابا نويل مش حقيقي هاهاهاهاهاهاها

Sunday, December 19, 2010

سكس اتراكشون



من انا وصغير، من ايام ما كانت تعجق ع تونيل نهر الكلب، وانا بشوف ع حيط بضبية دعاية كتير "ايموشنال". صرلها كيف ما كان شي 15 سنة، بغيروا ال"فيزوييل" بس دايما هي "دايو دوران".

الدعاية بتخبرك انو اذا بترش منها بتصير ملك "السكس" (صوري عالتعبير) وبتعرف الولد وين بروح تفكيره...
...بكرا بشتريها، برش منها وبعطيها لمعلمة الفرنسي ويا ويله...
بتمنّى عليكم تراعو شويّ احاسيس الاولاد بدعايتكم ولا تتركوها شي تك تك شي تيعة...

-تحية للصديقة التي ذكرتني بهذه القصة و تحية لمعلمة الفرنسي

Tuesday, December 14, 2010

قرض مصرفي لتتمكن من التزلج - Ski Loan

ها هو الثلج الابيض يفرش ثوبه على قمم جبال لبنان من جديد، وموسم التزلج واعد هذه السنة...

وبالمناسبة طرح بنك «الدَين والتفشيخ لبلدان لبنان والجوار» قرض جديد وهو "سكي لون" ليش؟ رح فسرلكم ليش:

- تتوصل عأقرب مركز تزلج بدّك بالقليلة تنكة بنزين، وهيك فتتحناها ب ٣٥،٠٠٠ ل.ل.
- فوق عندك ال "باركينغ" ب ٧،٢٥٠ ل.ل. وبما انو ما في فراطة، يعني اخذ ال ١٠،٠٠٠ ل.ل. كلها
- اجار ال "سكي" او ال "سنو بورد" بشي ٢٠،٠٠٠ ل.ل. والاحذية شي  ٢٠،٠٠٠ ل.ل. تانية (لتعويض خسارة سنة الماضية)
- وصلت لتاخد ال" تيكيت", هون اللذت، هالسنة عاملينها عالنزلة:
كل نزلة ب ٢٠،٠٠٠ ل.ل، هذه ليلّي بيعرف والمبتدء ٤٠،٠٠٠ ل.ل. لأن بضل عطيزو وبينزل اقل.
- "الكافيتيريا": مبيع الاكل باللقمة والشرب بالبلعة، حتى الكراسي تتعمل/لي "برونزاج" اجارهم بالدقيقة.
حتّى بيّاع اللوز والجوز عم ببيع بالحبّة.

بنّاشد وزارة السياحة مراقبة مراكز التزلج ومنع التنصيب عالمواطن والسلخ بالاسعار تتضلّ معقولة ومش شي تك تك شي تيعة...

وكل موسم وانتو بخير


Thursday, December 9, 2010

عجقة السير بسيلولير دركي




وها هي عدسات شي تك تك شي تيعة تلتقت سبب عجقة السير

القصة وما فيا، انو مبارح انا وراجع من شغلي عالبيت، و تحديداً في منطقة ضبيّة، على الجسر الذي يصل المارينا بالنقاش قرب قصر المؤتمرات وبعدما مشي خطي ثلاث مرات ويرجع يوقف. والعجقة خانقة واخر شي كان صرلي 20 دقيقة ع ذات الوقفة بكتشف انو الانسان يلي مولج بتنظيم السير، هو كمان واقف ع ذات الوقفة، اجر عالارض والتانية عالحفّة، مستمخّ بحديثه عـ "السيلولير" عم يتأمّل الاتوستراد تحته ومتل ما كان واضح انو يلي معو عالخطّ شخص جدا حميم، والغرام واضح ... لانو الاخ كان فاتح تمو وراخي...
انّ شي تك تك شي تيعة قد اخذت هذه الصورة كدليل وتضعها بتصرّف الجهات المعنية، وقد اصرّينا على ان تكون من الخلف لعدم نشر صورة المخطئ امام العلن، وتتمنى من الجهات المعنية محاربة هذا الفساد ولمزيد من الدقّة كان الوقت 6:37 مساءً بتوقيت شي تك تك شي تيعة

Tuesday, December 7, 2010

ردّ جميل... شكراً قطر



تعبيراً منا عن عطف ورعاية الدولة العربية قطر ومباركتها لكل ما نريد ان نقوم به في الوطن الحبيب، وبمناسبة فوزها باجراء مونديال 2022 على ارضها،
اعلن الكونسرفتوار الوطني ارسال بعثة، بعد 12 سنة، لافتتاح المونديال وستضمّ الفنانة الراقية «منظر مرعب» والفنان ذو الصوت الرنان «صوص العيد» بالاضافة الى الراقصة «ميالة»، يحيي الحفل المونولوج «صبر ايّوب»، اذا الله اطال بعمرهم.
كما وانّو حزب شباب الكوع سيقدّم عرضاً من ذخيرة الخطاط باشعال السماء وتحويلها شبكاً احمر، لم يتسنّى لشعوب العالم اجمعين ان رأوا مثله.
وهذا كلّه بمثابة شكر وردّ جميل وتما نطلع بلا ذوق وشي تك تك شي تيعة.

Monday, December 6, 2010

مبروك، بعد تسع اشهر نطرة



مبروك! اجانا صبي... اجانا بنت... اجو توم...
يعيش باسمو! الله خلصك بالسلامة! يربى بدلالكم! يربى تحت جناحكم! خليكم فوق راسو!
بس دخيلكم، ما بقى بدي شوف صور ولاد عمرهم ساعة وساعتين ع “فايس بوك”.

فرحتكم لارعتكم وانا شخصيا بهنيكم ع هل الانجاز. بس بذكركم انو “القرد بعين امو غزال”، انتو شايفينو غزال، انتو اهلو بس بصراح للغير معقول يكون اشبه بصوص مبلول ... شي تك تك شي تيعة...

هيدا بغض النظر انو الولاد ملايكة وما في اطيب منهم

Thursday, December 2, 2010

ليش مدندلها هيك

صحيح قلنا مدندلها بس هيّي للمظبوط ع كذا شكل ...

في منهم، بدندلوها من الشباك مسح مع الباب، هيدا بكون زهقان وعندو مشوار.
في قسم تاني، بيبقى ماددها من الشباك وعم ياعب بالهوا ع شكل "فرارو جاكو"
والقسم التالت والالذّ... هو يلي بيبقى عاملك مسرح صامت بإيدو، بسليك اذا انت سايق وراه... بتفهم كل القصة من حركات ايدو... معصب، مغروم (ومنها معو)، خبرية مفيدة، بس لت حكي، الخ...

والحلو انو هول كلهم بيستعملوها اشارة اذا قرر يفتلو بشي مفرق.
نصيحة، خليها جوّا لسلامتك الشخصية، السيارة "تو رسك" بس إنت لأ، للسلامة العامة استعمل بدالها الاشارة البتضوّي، وايديك الاثنين مفروض يكونو ع شكل 10:10 على المقود لتكون سواقتك سليمة ومش شي تك تك شي تيعة